Kryhen mbi 12 mijë teste të shpejta, Manastirliu: Rrisim kapacitetet e testimit për kapjen e hershme të rasteve COVID

0
59

Ministrja e Shëndetësisë dhe Mbrojtjes Sociale Ogerta Manastirliu ndoqi nga afër aplikimin e testimit të shpejtë në komunitet në qendrën shëndetësore nr. 10 në Tiranë, ku deklaroi se deri tani janë kryer mbi 12 mijë teste të shpejta të antigenit, duke rritur kapacitetet e testimit dhe gjurmimit.

“Çdo pikë e hapur në Tiranë për testimin e shpejtë në komunitet mbulon rreth 100,000 banorë, të cilët, kur kanë shenja apo dyshime, kanë qenë pjesë e kontaktit që kanë rezultuar pozitiv, lidhen me mjekun e familjes, përcaktojnë fashën orare dhe testi kryhet në një kohë shumë të shpejtë dhe me cilësi të lartë, pasi janë persona të trajnuar dhe profesionistë që kryejnë këtë testim. Vetëm ditën e djeshme me hapjen e 6 pikave janë më shumë se 300 testime të kryera, ndërkohë që prej fillimit të testimit të shpejtë janë më shumë se 12 mijë teste të shpejta të antigenit që janë kryer”, deklaroi Manastirliu.

Me qëllim kapjen e hershme të rasteve dhe izolimin e tyre, Manastirliu theksoi rolin kyç të mjekëve të familjes në këtë situatë, për ndjekjen dhe trajtimin e pacientëve dhe për t’i mbështetur me barnat që ata kanë nevojë.

“Mjeku i familjes ka rolin më kryesore  sa i përket  të gjithë ndjekjes së rasteve të dyshuara apo rasteve të cilat konfirmohen dhe më pas duhet të ndiqen nga pikpamja klinike, për tu mbështetur edhe me paketën e rimbursimit të barnave që trajtohen në banesë, por edhe për referim për ata që kërkojnë shërbim me të specializuar dhe dërgohen në strukturat tona spitalore”, tha Manastirliu.

Ministrja e Shëndetësisë theksoi se në varësi të fluksit, do të vijohet edhe me hapjen e 4 pikave të tjera për testimin e shpejtë në Tiranë, ndërkohë që spitalet rajonale në të gjithë vendin janë pajisur me teste të shpetja të antigenit. Manastirliu theksoi se paralelisht me testimin e shpejtë, po vijon të rriten kapacitetet për testimin klasik me metodën PCR.

Në prag të festave të fundvitit, ministrja u ka ribërë apel qëytearëve të mos e ulin vigjilencën dhe të shmangin grumbullimet.

“Në këtë periudhë festash një apel për të gjithë, për të kufizuar kontaktet, për të mbajtur maskën, për të ruajtur higjenën dhe distancën, sigurisht duke festuar në familjen e vogël, duke shpresur që së shpejti do t’i rikthehemi normalitetit”, tha Manastirliu.

 

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu